ߒߞߏ ߘߟߊߡߌߘߊߟߌ ߦߋ߫ ߢߊ߭ ߞߊ߲߬ ߡߌߞߙߏߛߐߝߕ ߢߍߥߟߊ ߞߣߐ߫

ߦߏ߫ ߊߟߎ߫ ߦߋ߫ ߒߞߏ ߟߊߕߘߍ߬ߞߏ ߞߊ߬ߟߊߡߊ߬ ߢߊ ߡߍ߲ ߡߌߞߙߏߛߐߝߕ ߟߊ߫ ߞߊ߲߫ ߅߉ ߛߙߍߘߍ ߟߎ߬ ߘߐ߫߸ ߒߞߏ ߦߋ߫ ߘߟߊߡߌߘߊߟߌ ߦߋ߫ ߢߊ߭ ߞߊ߲߬ ߡߌߞߙߏߛߐߝߕ ߢߍߥߟߊ ߞߣߐ߫ ߡߎߣߎ߲߬ ߞߵߊ߬ ߞߍ߫ ߊ߲߬ߞߌߟߋ ߘߌ߫، ߞߊ߬ߦߌ߯ ߘߐ߲߬ߞߌ߲ ߠߊ߫߸ ߓߊ߯ߙߊ߫ ߓߟߋߓߟߋ ߢߌ߲߬ ߛߌ߰ ߘߊ߫ ߛߋ߲߬ ߞߊ߲߬ ߒߞߏ ߡߌ߬ߙߌ߲߬ߘߌ ߓߟߏ߫߸ ߊ߬ ߛߌ߫ ߡߊ߫ ߕߏ߫ ߞߐ߫ ߞߏ ߣߌ߲߬ ߢߊ߬ߕߣߐ ߥߊ߬ߙߊ ߘߐ߫ ߒߞߏ ߞߊ߲߬ ߊ߬ ߣߴߊ߬ ߡߌ߬ߙߌ߲߬ߘߌ߫ ߦߙߊ߬ߓߌ߬ߣߍ߲߬ߓߊ ߞߊ߬ߞߎߘߊ ߥߙߎߞߌߞߏ ߟߎ߬ ߟߊ߫،.. ߞߊ߬ߦߌ߯ ߕߎ߬ߡߊ߬ ߖߏߣߊ ߏ߬ ߟߊ߫߸ ߕߐ߲߫ ߖߊ߯ߓߡߊ ߞߏߟߊߕߍ߮ ߟߎ߫ ߞߍ߫ ߘߊ߫ ߡߌߞߙߏߛߐߝߕ ߟߊ߫ ߓߘߍ߬ߓߘߍ߬ߟߌ ߢߍߥߟߊ ߝߊ߲߬ߓߊ ߞߊ߬ߟߊߡߊ߬ ߘߟߊߡߌߘߊߟߌ ߘߊߞߎ߲ ߘߐ߫ ߞߊ߬ ߓߍ߲߬ ߟߏ߲-ߏ-ߟߏ߲߫ ߓߊ߯ߙߊߢߐ߲߯ߦߊ߫ ߡߌߛߍ߲ ߠߎ߫ ߡߊ߬߸ ߦߏ߫ ߘߏ߫ ߞߍߣߍ߲߫ ߝߢߐߘߊ߫ ߈.߁ ߊ߬ ߣߌ߫ ߁߀ ߡߊ߬ߡߙߊ߬ߟߌ߬ ߞߣߍ (Control panel) ߘߐ߫ ߢߊ ߡߍ߲،

ߞߏ߬ߣߌ߲߬ ߓߊߏ߬߸ ߦߋ߲߬ ߘߟߊߡߌߘߊߟߌ ߦߋ߫ ߘߟߊߡߌߘߊߟߌ߫ ߖߙߌ ߟߋ߬ ߘߌ߫߸ ߦߏ߫ ߞߊ߬ ߕߎ߬ߡߊ߬ߞߎ߲ ߣߌ߫ ߕߎ߬ߡߊ߬ߘߊ ߣߌ߫ ߟߐ߯ߕߍ ߟߏ߲߫ ߕߐ߮ ߟߎ߫ ߦߟߍ߬ߡߊ߲߬ ߒߞߏ ߘߐ߫߸ ߊ߬ ߣߌ߫ ߘߏ߫ ߜߘߍ߫ ߟߎ߫، .. ߒ߬ߓߊ߬ ߘߟߊߡߌߘߊߟߌ ߏ߬ ߝߘߏ߬ߓߊ߬ߦߊ ߞߵߊ߬ ߞߍ߫ ߘߟߊߡߌߘߊ߫ ߡߊ߬ߡߊ߬ߟߊ ߘߌ߫߸ ߓߍ߯ ߦߋ߫ ߛߋ߫ ߊ߬ ߞߣߐ߫ ߞߎߡߊ߫ ߦߟߍ߬ߡߊ߲߬ ߠߊ߫ ߘߟߊߡߌߘߊߟߌ߫ ߞߊ߲ ߠߎ߬ ߛߎߡߊ߲ߘߊ߲ߕߊ ߘߐ߫߸ ߣߊߟߌ߬ߡߎ߲߫ ߊ߲߬ߞߌ߬ߟߋ߬ߞߊ߲ ߘߌ߫߸ ߏ߬ ߟߋ ߣߊ߬ ߒߞߏ ߥߙߎߞߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ (ߒ.ߥ.ߛ.ߖ.) ߞߏߟߊߕߍ߮ ߟߎ߫ ߟߐ߬ ߟߊ߫ ߞߍߢߊ ߏ߬ ߕߌߙߌ߲߫ ߠߊ߫߸ ߞߵߊ߬ ߣߴߊ߬ ߣߐ߬ߝߍ߬ߞߏ ߟߎ߬ ߓߍ߯ ߢߊߦߋ߫ ߞߐߘߍ߫߸ ߞߵߊ߬ ߕߏ߫ ߊ߬ ߟߥߊߟߋ ߡߊ߬.
ߊ߬ ߟߐ߲߫ ߘߊ߫ ߞߊ߬ ߝߐ߫ ߞߏ߫ ߛߐ߲߬ߞߐ ߡߍ߲ ߠߎ߬ ߓߍ߯ ߦߋ߫ ߡߌߞߙߏߛߐߝߕ ߞߏߟߊߘߍ ߓߟߏ߫߸ ߊ߬ ߦߋ߫ ߘߊ߫ ߞߏ߫ ߒߞߏ ߡߌ߬ߙߌ߲߬ߘߌ ߘߌ߫ ߛߋ߫ ߛߐ߲߬ߞߐ ߡߍ߲ ߞߘߐ߫ ߕߋ߲߬ߕߋ߲߬߸ ߏ߬ ߟߋ ߘߟߊ߫ ߆߀.߀߀߀ ߘߌ߫ ߛߊ߲߬ ߅ ߞߎ߲߬ߕߊ߮ ߞߘߐ߫߸ ߏ߬ ߟߋ ߥߊߘߌ ߟߊߘߌ ߦߴߌߘߐ߫ ߕߋ߬ߟߋߝߌ߬ߟߊ ߢߌ߲߬ ߘߐ߫߸ ߣߌ߫ ߘߟߊ߫ ߄߅߆߉߈ ߓߘߊ߫ ߛߐ߬ߘߐ߲߫ ߏ߬ ߘߐ߫ ߕߋ߲߬ߕߋ߲߬߸ ߊ߬ ߕߐ߭ ߦߋ߫ ߘߟߊ߫ ߁߄߃߀߂ ߘߌ߫ ߊ߬ ߓߌ߬ ߝߐߟߌ߫ ߘߐ߫ ߀߂/߀߉/߂߀߁߈ ߣߌ߲߬ ߠߊ߫، ߕߐ߭ ߏ߬ ߛߐ߬ߘߐ߲߬ߠߌ߲ ߠߋ߬ ߡߊߞߐ߬ߣߐ߲ ߦߴߌߘߐ߫߸ ߛߊ߫ ߓߊ߯ߙߊ߫ ߡߐ߬ߟߐ߲߬ߡߊ ߢߌ߲߬ ߘߌ߫ ߓߟߏߦߊ߫. ߞߊߙߏ߫ ߛߊ߬ߣߍ߲ ߠߊ߫ ߊ߲ ߕߘߍ߬ ߦߋ߫ ߡߊ߬ߝߟߍ߬ߟߌ ߞߎ߲߬ߢߊ߬ ߝߟߐ ߟߋ߬ ߘߐ߫߸ ߊ߬ ߦߋ߫ ߘߴߏ߬ ߘߐ߫ ߝߛߊߦߌ߫ ߞߏ߫ ߒߞߏ ߘߌ߫ ߛߋ߫ ߕߘߍ߬ ߟߊ߫ ߡߌߞߙߏߛߐߝߕ ߟߊ߫ ߞߊ߲߫ ߅߉ ߘߟߊߡߌߘߊߟߌ ߘߐ߫ ߢߐ߲߮ ߘߐ߫߸ ߞߐ߬ߣߌ߲߬ ߕߎ߬ߡߊ߬ ߖߏߣߊ ߏ߬ ߟߊ߫߸ ߗߋߢߊߘߊ߮ ( Serveur ) ߕߎ߲߬ ߡߊ߫ ߡߊߛߐ߫ ߒߞߏ ߟߐ߲ߕߊ߫ ߛߌߦߊߡߊ߲߫ ߠߊ߫ ߝߟߐ߫ ߡߊ߬ߝߍ߬ߣߍ߲߬ߠߌ߲߬ߞߏ ߘߐ߫،..
ߞߐ߬ߣߌ߲߬ ߞߎߣߎ߲߬ ߞߏ߲ߞߏߜߍ ߕߟߋ߬ ߈ ߡߊ߬߸ ߘߏ߲߬ ߞߍ߫ ߘߊ߫ ߡߊ߬ߝߍ߬ߣߍ߲߬ߠߌ߲ ߞߎ߲߬ߢߊ߬ ߝߌߟߊߣߊ߲ ߘߐ߫߸ ߏ߬ ߟߋ߬ ߞߍ߫ ߘߊ߫ ߛߍߥߊ ߖߍ߬ߖߍߖߍ߬ߘߍ ߘߌ߫، ߓߊߏ߬߸ ߊ߲ ߞߊ߬ ߡߊ߬ߝߍ߬ߣߍ߲߬ߠߌ߲ ߡߍ߲ ߠߎ߬ ߞߍ߫ ߞߎߣߎ߲߬ ߛߎ߫ ߕߊ߬ߡߌ߲߬ߣߍ߲ ߢߌ߲߬ ߘߐ߫߸ ߏ߬ ߘߟߊߡߌߘߊߟߌ ߢߊ߬ߣߍ߲߫ ߞߊ߬ ߓߐ߫ %߁߅ ߞߊ߬ ߛߋ߫ %߂߀ ߡߊ߬. ߏ߬ ߞߘߐ ߟߋ߬ ߞߏ߫: ߝߊ߬ߣߌ߫ ߗߋߢߊߘߊ߮ ߦߋ߫ ߕߊ߬ߡߌ߲߬ ߠߊ߫ ߡߊߛߐ߫ ߟߊ߫ ߟߐ߲ߕߊ ߥߊ߯ ߓߌ߫ ߦߙߌߞߊ ߟߎ߬ ߟߊ߫߸ ߘߟߊߡߌߘߊߟߌ ߝߣߊ߫ ߞߛߊߞߊ߫ ߘߌ߫ ߕߊ߬ߡߡߌ߲߬ ߡߊߦߟߍ߬ ߟߊ߫،..
ߒ߬ߓߊ߬ ߒ߬ ߠߊ߫ ߘߟߊ߫ ߥߊ߯ ߆߀ ߕߐ߬ ߥߊ߯ ߁߄ ߕߐ߭ ߘߝߊ ߟߋ߬ ߞߍߕߐ߫ ߞߎߡߦߊ ߟߎ߬ ߓߊ߯ߙߊ ߥߓߊ߬ߞߏ߬ߞߍ ߏ߬ ߘߊߡߌ߬ߘߊ߬ߣߍ߲ ߘߌ߫߸ ߞߵߊ߬ ߟߊߓߌ߬ߟߊ߬ ߓߍ߯ ߦߋ߫ ߞߐߘߍ߫، ߞߏ߬ߣߌ߲߬ ߊ߲ ߧߋ߫ ߟߏ߲ ߡߍ߲ ߘߐ߫ ߓߌ߬ ߘߌ߫߸ ߡߍ߲ ߠߎ߬ ߟߊ߫ ߢߎߡߍߙߋ߲ߞߏ߲ߘߏ ߓߘߊ߫ ߓߊ߲߫ ߟߊߘߏ߲߬ ߠߊ߫ ߞߊ߬ߙߊ߲߬ߡߐ߯ ߓߊ߬ߓߊ߫ ߖߊ߰ߣߍ߬ ߝߍ߬ ߘߟߊߡߌߘߊߟߌ ߡߊߝߍߣߍ߲ߞߏ ߘߐ߫߸ ߏ߬ ߓߍ߯ ߘߌ߫ ߛߋ߫ ߘߏ߲߬ ߠߴߊ߬ ߟߊ߫ ߖߊ߬ߕߋ߬ߘߊ ߏ߬ ߟߊ߫ ߕߋ߲߬ߕߋ߲߬߸ ߞߵߊ߬ ߡߊߝߍߣߍ߲߫ ߞߎߘߊߞߍ߫، ߡߌߞߙߏߛߐߝߕ ߖߍ߬ߘߍ ߣߊ߬ ߗߋߛߓߍ ߡߍ߲ ߟߊߕߊ߯ ߟߴߊ߬ߟߎ߫ ߡߊ߬ ߞߊ߬ߣߌ߲߬.. ߒ߬ߓߊ߬ ߊߟߎ߫ ߣߌ߫ ߖߐ߫ ߏ߬ ߕߎ߬ߡߊ، ߊߟߎ߫ ߣߌ߫ ߡߊ߬ߝߍ߬ߣߍ߲߬ߠߌ߲߬ ߞߏ߬ ߢߌߡߊ߫.

ߛߏ߬ߟߏ ߝߙߊ߬ߓߊ-ߘߐ߫ ߛߌ߬ߛߋ߫ ߓߟߏ߫